🔹 الجديدة.. توقيف شخص خطير ظهر في فيديو وهو يعتدي على سيدة بسلاح أبيض
تمكّنت فرقة مكافحة العصابات التابعة للشرطة القضائية بالجديدة، نهار السبت 5 أبريل، من توقيف شخص عندو سوابق عدلية، بعدما ظهر ففيديو كيدور فمواقع التواصل، كيتورّط فيه فاعتداء بالسلاح الأبيض على سيدة فالشارع العام.
وحسب المعطيات الأمنية، المشتبه فيه كان على معرفة سابقة بالضحية، ووقف ليها فالطريق واعتدى عليها جسديًا بطريقة خطيرة، باستعمال سلاح أبيض. دوافع هاد الاعتداء مازال كيتحققو فيها المحققين.
التدخل السريع ديال الشرطة مكن من توقيف المعني بالأمر فالحين، وتم الحجز على السلاح اللي استعملو. ومن خلال تنقيطو فقاعدة بيانات الأمن الوطني، تبيّن أنه مطلوب وطنيا فملفات مرتبطة بترويج المخدرات.
وقد تم وضع المشتبه فيه تحت تدابير الحراسة النظرية، باش يتعرض للتحقيق تحت إشراف النيابة العامة، في انتظار كشف كل الملابسات ديال هاد الجريمة.