عـن – كود
نشرت صحيفة “جون أفريك” الفرنسية مقال هضرات فيه على حياة رئيس الجهة الشرقية عبد النبي بعوي المعتقل حاليا بالسجن المحلي عكاشة على خلفية تورطه في قضية ما يعرف بـ”إسكوبار الصحراء”.
الصحفية هضرات على بعوي بتفاصيل دقيقة وقالت باللي دار بزاف داللفلوس من والو، وخرج من المدرسة وهو صغير، وكشفت باللي القيادي البامي دخل للحبس في فرنسا على خلفية تورطه في قضية تتعلق بالسرقة، بالإضافة إلى أن بعيوي تشد حتى في إسبانيا.
وهضرات حتى على الوزن ديال بعيوي في عالم المال والأعمال وباللي الرجل رجع من الأعيان في ظروف غامضة وفوقت قياسي من الزمن، حيث أسس شركته “Bioui Travaux” اللي خدات مارشيات كثيرة مع عدد من المؤسسات العمومية.
وأكدت ذات الصحيفة باللي هاد الشركة فات رأسمالها 100 مليون درهم، وباللي خدات مارشيات مع المكتب الوطني للكهرباء والماء وشركة الطرق السيارة بالمغرب والمكتب الوطني للسكك الحديدية، وغيرها من المؤسسات العمومية الكبرى.
كما تساءلت جون افريك عن الفلوس اللي كان كيحطها بعيوي في مؤسسات بنكية، حسب ما جاء في نتائج الأبحاث التي باشرتها الفرقة الوطنية للشرطة القضائية، وكيفاش هاد الأبناك مدارتش التدقيق في مصدر هاد لفلوس اللي فاقت 80 مليون درهم.
رئيس الجهة الشرقية كيف هضرات عليه الصحفية الفرنسية، كانوا عندو بزاف ديال المناصب سواء في عالم السياسة او الأعمال، وعاد باش انه رئيس د مؤسسة خيرية تسمى “بسمة للأعمال الخيرية”.